कोशीदेखि लुम्बिनीसम्म परेको वर्षाले गर्मीबाट आंशिक राहत दिलाए पनि लुम्बिनीदेखि पश्चिमका तराई क्षेत्रमा भने अझै चर्को गर्मी कायम छ । तर, मौसमविद्हरूका अनुसार भोलिदेखि पश्चिम तराईमा पनि वर्षा हुने भएकाले गर्मीबाट राहत मिल्ने अपेक्षा गरिएको छ ।

जल तथा मौसम विज्ञान विभाग, मौसम पूर्वानुमान महाशाखाका अनुसार भोलि देशका सबै प्रदेशका तराई तथा पहाडी भूभागका धेरै स्थानमा मेघगर्जन र चट्याङसहित मध्यम वर्षाको सम्भावना रहेको छ । हिमाली क्षेत्रमा भने हिउँ वा वर्षा हुन सक्ने अनुमान गरिएको छ ।

मौसमविद् बिनु महर्जनका अनुसार बुधबारदेखि बिहीबारसम्म कोशी प्रदेशका अधिकांश स्थानमा तथा मधेश, बागमती, गण्डकी, लुम्बिनी र सुदूरपश्चिम प्रदेशका केही स्थानमा मध्यम वर्षा हुने सम्भावना छ ।

विभागले आज लुम्बिनी र सुदूरपश्चिमका तराई क्षेत्रमा तातो मौसम कायमै रहने जनाएको छ । तर, भोलिदेखि सुरु हुने वर्षासँगै ती क्षेत्रमा पनि शीतलता महसुस हुने अपेक्षा गरिएको छ ।

आइतबार देशका मध्य र पूर्वी क्षेत्रका धेरै स्थानमा वर्षा भएको थियो, जसका कारण तापक्रम केही घटेको छ । साथै, डढेलो र प्रदूषणमा कमी आएको छ । यद्यपि, कतिपय स्थानमा हावाहुरी र असिनाले क्षति पुर्‍याएको विवरण पनि प्राप्त भएको छ ।

विभागका अनुसार हाल पश्चिमी र स्थानीय वायुका साथै पूर्वी भाग नजिक तल्लो वायुमण्डलमा रहेको न्यूनचापीय क्षेत्रको आंशिक प्रभावका कारण यस साता देशभर बदली र वर्षाको क्रम जारी रहनेछ ।

मुसिकोटमा सर्वाधिक वर्षा
गत २४ घण्टामा सबैभन्दा बढी वर्षा गुल्मीको मुसिकोटमा मापन गरिएको छ । त्यहाँ ७८.२ मिलिमिटर वर्षा रेकर्ड भएको विभागले जनाएको छ ।

त्यसैगरी आँपचौरमा ४८.४ मिलिमिटर, बडिगाड रुद्रवेणीमा ३५ मिलिमिटर र भार्सेमा १८ मिलिमिटर वर्षा मापन भएको छ । ती क्षेत्रका साना खोलानाला तथा नदीहरूमा बाढीसमेत आएको थियो ।

प्युठानको सेउलीबाङमा ४५.६ मिलिमिटर र झापाको केचनामा ४० मिलिमिटर वर्षा मापन भएको छ । काठमाडौं उपत्यकामा पनि वर्षा भएकोमा सबैभन्दा बढी नैकापमा २६.२ मिलिमिटर वर्षा रेकर्ड गरिएको छ ।