तराई क्षेत्रमा निरन्तर तापक्रम वृद्धि भएर जनजीवन अस्तव्यस्त बन्दै गएपछि जल तथा मौसम विज्ञान विभागले सर्वसाधारणलाई विशेष सावधानी अपनाउन आग्रह गरेको छ। विभागले आगामी तीन दिनसम्म सुदूरपश्चिम र लुम्बिनी प्रदेशका तराई भू-भागमा तीव्र गतिमा तातो हावा (लू) चल्ने चेतावनी दिएको छ।

विभागका प्रवक्ता विभूति पोखरेलका अनुसार आगामी दिनमा नेपालगञ्ज र भैरहवाको अधिकतम तापक्रम ४१ डिग्री सेल्सियस तथा धनगढीको तापक्रम ४० डिग्री सेल्सियससम्म पुग्ने पूर्वानुमान गरिएको छ। तराई मात्र नभई बागमती र गण्डकी प्रदेशका पहाडी तथा मैदानी क्षेत्रमा समेत तापक्रम बढ्ने क्रम जारी रहने देखिएको छ। यसैगरी वीरेन्द्रनगर र घोराही क्षेत्रको तापक्रममा पनि उल्लेख्य वृद्धि हुने विभागले जनाएको छ।

अत्यधिक गर्मी र लूका कारण स्वास्थ्यमा गम्भीर संकट आउन सक्ने भएकाले अत्यावश्यक कामबाहेक दिउँसोको समयमा घरबाहिर ननिस्कन, बाहिर निस्कनै परे छाता ओढ्न, र शरीरमा पानीको कमी हुन नदिन पर्याप्त मात्रामा तरल पदार्थ पिउन प्रवक्ता पोखरेलले आग्रह गरेकी छिन्।

मौसम पूर्वानुमान महाशाखाले गर्मीका कारण आउने स्वास्थ्य समस्याहरूबाट जोगिन तराई भेगका स्थानीय तह र सर्वसाधारण दुवैलाई सचेत रहन अपिल गरेको छ।