शनिबार चीनको तिआनजिनमा नेपालका प्रधानमन्त्री केपी शर्मा ओली र चिनियाँ राष्ट्रपति सी चिनफिङबीच भएको भेटवार्तापछि नेपाल र चीनले जारी गरेका विज्ञप्तिमा महत्त्वपूर्ण विषयमा भिन्नता देखिएको छ।
बेइजिङस्थित नेपाली दूतावासले जारी गरेको विज्ञप्तिअनुसार, प्रधानमन्त्री ओलीले राष्ट्रपति सीसमक्ष लिपुलेक नेपालको भूभाग भएको प्रष्ट पार्दै भारत–चीनबीच त्यहाँ व्यापारिक नाका खोल्ने समझदारीप्रति नेपालले गम्भीर आपत्ति जनाएको उल्लेख छ। दूतावासको विज्ञप्तिमा ओलीले लिपुलेक विवाद दृढतापूर्वक उठाएको जनाइएको छ।
तर, चिनियाँ परराष्ट्र मन्त्रालयले भेटवार्ताबारे जारी गरेको आधिकारिक विज्ञप्तिमा भने लिपुलेक वा सीमा विवादसम्बन्धी कुनै प्रसंग उल्लेख गरिएको छैन। त्यसको सट्टा, चिनियाँ विज्ञप्तिमा राष्ट्रपति सीले नेपालसँगको परम्परागत मित्रता सुदृढ गर्दै उच्च गुणस्तरको “बेल्ट एण्ड रोड इनिसिएटिभ” (बीआरआई) सहकार्यलाई अघि बढाउने, पूर्वाधार, ऊर्जा, कृषि, विज्ञान–प्रविधि, स्वास्थ्य, शिक्षा लगायतका क्षेत्रमा सहकार्य विस्तार गर्ने र बहुपक्षीय मञ्चहरूमा समन्वय गर्न इच्छुक रहेको उल्लेख छ।
राष्ट्रपति सीले नेपालका विकास–समृद्धिका आकांक्षामा सहयोग गर्ने प्रतिबद्धता जनाउँदै, प्रधानमन्त्री ओलीलाई नेपालको “एक चीन नीति” प्रति दृढ प्रतिबद्धताका लागि धन्यवाद दिएका छन्। उनले संयुक्त राष्ट्रसंघ र शाङ्घाई सहयोग संगठन (एससीओ) जस्ता मञ्चमा दुवै देशबीच सहकार्य बढाउने कुरा जोड दिए।
चिनियाँ विज्ञप्तिअनुसार, प्रधानमन्त्री ओलीले पनि नेपालले “एक चीन सिद्धान्त”मा दृढ रहेको, “ताइवान स्वतन्त्रता”को कडा विरोध गर्ने र कुनै पनि शक्तिलाई नेपालको भूमि चीनको हितविरुद्ध प्रयोग गर्न नदिने प्रस्ट पारे। साथै, उनले बीआरआई अन्तर्गत व्यापार, लगानी, कृषि, विज्ञान–प्रविधि, पर्यटनलगायत क्षेत्रमा सहकार्य गहिरो बनाउन चाहेको उल्लेख गरिएको छ।
ओली–सी भेटमा दुवै नेताबीच आपसी रणनीतिक विश्वास, पारस्परिक सहयोग, बहुपक्षीय मञ्चहरूमा सहकार्य, तथा क्षेत्रीय स्थिरता र समृद्धिबारे छलफल भएको बताइएको छ।
प्रधानमन्त्री ओली शाङ्घाई सहयोग संगठन (एससीओ) को शिखर सम्मेलनमा सहभागी हुन चीन भ्रमणमा रहेका छन्। शनिबारको भेटमा चिनियाँ कम्युनिस्ट पार्टीका उच्च पदस्थ नेताहरू काइ छी, वाङ यी र छेन मिनअर पनि उपस्थित थिए।
तपाईको प्रतिक्रिया दिनुहोस