संयुक्त राष्ट्रसङ्घको कोप–२९ वार्तामा अमेरिकाका जलवायु दूत जोन पोडेस्टाले  डोनाल्ड ट्रम्प पुनः निर्वाचित भए पनि अमेरिकाले जलवायु परिवर्तन विरुद्धको लडाईं जारी राख्ने बताएका छन्। ट्रम्पको पेरिस सम्झौताबाट बाहिरिने पूर्वनिर्णय र जलवायु परिवर्तन प्रतिको शङ्काले कोप-२९मा वार्तामा प्रभाव पार्ने छ।

पोडेस्टाले भनेका छन्, "संयुक्त राज्य अमेरिकाको संघीय सरकारले जलवायु कार्यलाई पछाडि धकेल्न सक्छ, तर अमेरिकामा स्थानीय स्तरमा जलवायु संरक्षण प्रतिको प्रतिबद्धता कायम रहनेछ। यो लडाईं कुनै चुनाव या राजनीतिक चक्रभन्दा परको विषय हो।"

यही बीचमा संयुक्त राष्ट्रसङ्घका जलवायु प्रमुख सिमोन स्टिएलले धनी राष्ट्रहरूलाई जलवायु वित्तमा सहयोग दिन आग्रह गरेका छन्। साथै, विकासशील राष्ट्रहरूको जलवायु प्रभाव सामना गर्न वार्षिक १०० अर्ब डलरको वित्तीय सहयोग आवश्यक रहेको उल्लेख गरिएको छ।