क्यानाडाले मङ्गलबारदेखि केही अमेरिकी वस्तुहरूमा २५ प्रतिशत भन्सार महसुल लगाउने घोषणा गरेको छ। प्रधानमन्त्री जस्टिन ट्रुडोले शनिबार दिनुभएको यो घोषणा अमेरिकी राष्ट्रपति डोनाल्ड ट्रम्पको व्यापक भन्सार नीतिको जवाफस्वरूप आएको हो ।

प्रधानमन्त्री ट्रुडोले पहिलो चरणमा ३० अर्ब क्यानेडियन डलर बराबरका अमेरिकी वस्तुमा महसुल लागू गरिने र तीन हप्ताभित्र थप एक खर्ब २५ अर्ब क्यानेडियन डलर मूल्यका उत्पादनमा महसुल लगाइने बताएका छन् ।

उनले थप भने, “हामी तनाव बढाउन चाहँदैनौँ तर क्यानाडाली उद्योग र रोजगारीका लागि उभिन बाध्य छौँ।” अमेरिकी बियर, वाइन, बर्बन, फलफूल, तरकारी, काठ, प्लास्टिक र उपभोक्ता उपकरणहरूमा भन्सार महसुल लागू हुनेछ।

ट्रुडोले व्यापार विवादले रोजगारी गुम्ने, खाद्यान्न र पेट्रोलको मूल्य बढ्ने तथा सवारी प्लान्टहरू बन्द हुने सम्भावना रहेको चेतावनी दिएका छन् । अल्बर्टाकी प्रिमियर डेनिएल स्मिथले यो नीतिलाई "पारस्परिक विनाशकारी" भन्दै दुई देशबीचको सम्बन्ध कमजोर बनाउने बताएकी छन् । ब्रिटिस कोलम्बियाका प्रिमियर डेभिड इबीले अमेरिकी भन्सार नीति "ऐतिहासिक विश्वासघात" भएको टिप्पणी गरिन् ।

ओटावामा भएको एनएचएल हकी खेलमा दर्शकहरूले अमेरिकी राष्ट्रिय गानको बेला विरोध जनाएका थिए । ट्रम्पको भन्सार नीति
अवैध आप्रवासन र लागुऔषध समस्यालाई उद्धृत गर्दै राष्ट्रपति ट्रम्पले क्यानाडा, मेक्सिको र चीनमाथि व्यापक भन्सार लगाउने घोषणा गरेका थिए।

ट्रुडोले क्यानाडाले सदैव अमेरिकाको कठिन परिस्थितिमा साथ दिएको उल्लेख गर्दै यस निर्णयले दुई देशबीचको सहकार्यमा धक्का पुर्‍याउने चेतावनी दिए ।