इंग्ल्यान्डका स्टार अलराउन्डर बेन स्टोक्सले अन्तर्राष्ट्रिय क्रिकेटबाट सन्यासको घोषणा गरेका छन्। न्युजिल्यान्डविरुद्ध ट्रेन्ट ब्रिजमा जारी तेस्रो टेस्टका क्रममा उनले आफ्नो अन्तर्राष्ट्रिय करिअर टुंग्याउने निर्णय सार्वजनिक गरेका हुन्।

इंग्ल्यान्ड क्रिकेट इतिहासका उत्कृष्ट अलराउन्डरमध्ये एक मानिने ३५ वर्षीय स्टोक्स बलिङ गरिरहेकै बेला उनको सन्न्याससम्बन्धी आधिकारिक विज्ञप्ति सार्वजनिक गरिएको थियो।

यसअघि लन्डनको एक नाइट क्लबमा भएको घटनाका कारण दोस्रो टेस्ट गुमाएका स्टोक्स नटिङ्घममा टोलीको नेतृत्व गर्दै फर्किएका थिए। उनले यसअघि नै आफूले ‘यस हप्ताका लागि मात्रै’ टोलीको नेतृत्व गर्ने संकेत दिएका थिए।

निर्णायक टेस्टको चौथो दिनको खेल सुरु हुनुअघि स्टोक्सले ड्रेसिङ रुममा सहकर्मीहरूलाई आफ्नो सन्न्यासबारे जानकारी दिएका थिए। त्यसक्रममा उनी निकै भावुक बनेका थिए।

उनले भने - “मैले किन सन्न्यास लिने निर्णय गरेँ भन्नेबारे पछि कुरा गरौँला। तर मैले यो टोली, तपाईँहरू र म भन्दा अघिका खेलाडीहरूका लागि सधैँ आफ्नो सबैथोक दिएको छु। अब मसँग केवल एकपटक मात्रै यसरी लड्ने अवसर बाँकी छ।”

सहकर्मीहरूलाई सम्बोधन गर्दै उनले थपे, ‘मेरो एउटै अनुरोध छ, तपाईँहरू सबैले पनि आफ्नो शतप्रतिशत दिनुहोस्। नतिजा जे आए पनि, मैदान छाड्दा हामीले अन्तिम दुई दिन आफ्नो सम्पूर्ण शक्ति लगायौँ भन्ने महसुस हुनुपर्छ। यो केवल मेरो लागि होइन, यो टोलीका लागि हो।’

आफ्नो सम्बोधनको अन्त्यमा स्टोक्सले भने, “मैले आफ्नो भावनालाई नियन्त्रण गरिसकेको छु। अब मैदानमा उत्रिएर काम देखाउने समय आएको छ। कृपया, सबैजना मलाई साथ दिनुहोस्।”

स्टोक्सको सन्न्याससँगै इंग्ल्यान्ड क्रिकेटले आफ्नो स्वर्णिम पुस्ताका एक प्रभावशाली अलराउन्डरलाई गुमाएको छ। उनले ब्याट र बल दुवैबाट अनेक ऐतिहासिक प्रदर्शन गर्दै इंग्ल्यान्डलाई थुप्रै यादगार जित दिलाएका थिए।