अर्जेन्टिनाका विश्वप्रसिद्ध फुटबलर लियोनल मेसीका बुबा तथा पूर्वएजेन्ट जर्ज मेसीको ६८ वर्षको उमेरमा निधन भएको छ।

अर्जेन्टिनाको सञ्चारमाध्यम ‘इन्फोबाए’ र विभिन्न अन्तर्राष्ट्रिय सञ्चार माध्यमका अनुसार लामो समयदेखि स्वास्थ्य समस्याबाट पीडित जर्जको रोसारियोस्थित एक अस्पतालमा उपचारका क्रममा निधन भएको हो। जर्ज मेसी लियोनलका पिता मात्र नभई उनको लामो समयका मुख्य एजेन्टसमेत थिए। मेसीको बाल्यकालदेखि नै उनले छोराको फुटबल यात्रामा पर्दापछाडिबाट महत्वपूर्ण र मार्गदर्शक भूमिका निर्वाह गरेका थिए।

बाल्यकालमा मेसीलाई वृद्धि हर्मोनको कमीसम्बन्धी उपचार आवश्यक पर्दा जर्जले त्यसको व्यवस्था मिलाउन ठूलो संघर्ष र पहल गरेका थिए। मेसी १३ वर्षको उमेरमा स्पेन गएर बार्सिलोनामा नयाँ फुटबल यात्रा सुरु गर्दा उनी छोरासँगै स्पेन पुगेर सुरुवाती दिनमा मुख्य सहारा बनेका थिए। त्यसपछि दशकौँसम्म जर्जले मेसीको व्यावसायिक करिअर, क्लब स्थानान्तरण र सम्झौताहरूको व्यवस्थापन गर्दै आएका थिए।

सार्वजनिक रूपमा भने जर्ज निकै कम मात्र देखिने गर्दथे। उनी सञ्चारमाध्यमबाट टाढै रहेर मेसीको करिअरलाई विश्वको सर्वोच्च स्थानसम्म पुर्याउन अहोरात्र खटिएका थिए। पछिल्लो समय उनको स्वास्थ्य अवस्था लगातार कमजोर बन्दै गएको थियो। विश्वकपका क्रममा मैदानमा भावुक बनेका मेसीले आफू व्यक्तिगत र पारिवारिक रूपमा कठिन समयबाट गुज्रिरहेको सङ्केत गरेका थिए। त्यसबेला विभिन्न खाले अफवाह फैलिएपछि मेसी परिवारले विज्ञप्ति जारी गर्दै गोपनीयता र सम्मानको अपिल गरेको थियो।

जुलाईको अन्त्यतिर मेसीले मेजर लिग सकर (MLS) अल-स्टार खेल समेत गुमाएका थिए। मेसीको विश्वप्रसिद्ध फुटबल यात्रा र सफलतामा बुबा जर्जको योगदान अविस्मरणीय मानिन्छ। उनको निधनले विश्व फुटबलका स्टार लियोनल मेसी र उनको परिवारलाई गहिरो शोकमा पारेको छ।