अमेरिकी सेनाले पूर्वी प्रशान्त महासागरमा गरेको पछिल्लो समुद्री कारबाहीमा दुई जनाको मृत्यु भएको छ । लागुऔषध तस्करीमा संलग्न रहेको आशंकामा गरिएको उक्त आक्रमणपछि अमेरिकी अभियानमा ज्यान गुमाउनेको संख्या कम्तीमा १९२ पुगेको जनाइएको छ ।

अमेरिकी दक्षिणी कमान्ड (साउथकम) का अनुसार आक्रमणमा एक व्यक्ति जीवित बचेका छन् । उनलाई उद्धार गर्न अमेरिकी तटरक्षक बललाई खोज तथा उद्धार अभियान सञ्चालन गर्न सूचित गरिएको छ ।

साउथकमले सामाजिक सञ्जाल एक्समार्फत उक्त डुङ्गा “आतंकवादी सूचीमा रहेका समूह” द्वारा सञ्चालन गरिएको दाबी गर्दै गुप्तचर सूचनाका आधारमा जहाज नार्को–तस्करीका परिचित मार्गमा सक्रिय रहेको जनाएको छ ।

सार्वजनिक गरिएको भिडियोमा एउटा सानो डुङ्गा समुद्रमा अघि बढिरहेको देखिन्छ । केही क्षणपछि ठूलो विस्फोट भई डुङ्गा ध्वस्त भएको दृश्य देखाइएको छ ।

अमेरिकी प्रशासनले गत सेप्टेम्बरदेखि लागुऔषध तस्करीमा संलग्न डुङ्गा लक्षित गर्दै आक्रामक अभियान सुरु गरेको थियो । यसलाई ल्याटिन अमेरिकाबाट सञ्चालित ‘नार्को–आतंकवादी’ समूहविरुद्धको अभियानका रूपमा प्रस्तुत गरिएको छ ।

यद्यपि, अमेरिकी प्रशासनले निशाना बनाइएका जहाजहरू लागुऔषध तस्करीमै संलग्न थिए भन्ने ठोस प्रमाण सार्वजनिक गरेको छैन । कानुनी विज्ञ र मानवअधिकार समूहहरूले भने यस्ता आक्रमणलाई “गैरन्यायिक हत्या” को संज्ञा दिएका छन् । उनीहरूका अनुसार तत्काल अमेरिकी सुरक्षामा खतरा नपुर्‍याउने नागरिकलाई प्रत्यक्ष निशाना बनाइनु अन्तर्राष्ट्रिय कानुनविपरीत हुन सक्छ ।

शुक्रबारको आक्रमण पछिल्लो एक महिनाभित्र भएको कम्तीमा दशौँ कारबाही भएको जनाइएको छ ।